ست الدار...... أمي
مدونه علي يوميات قلم عاشق
&&&&&&&&&&&&&&&&&&&&&&&&&
كتير عليك النومه يا امه
والتعب شاقق ضلوعك
والحياة من غيرك ضلمه
مش عايزا ترجع قبل رجوعك
وانت اللي سايقة المركبة
ومسيراها
رافعة راسنا بالصواري
ومثبتانا بقلوعك
شايف في عينيك الزمن
مليان آهات الفراق
والحزن ويا المحن سارح زي البراق
شاقق أراضِ الخوف حزين ع الرفاق
وضغوط المرض شايفها في دموعك
وبتطفي واحدة واحدة شموعك
ومرور الزمن عدا عليك نهار
وانت سارحة ف مغربية
وبدون اختيار
وانت فاكرا الزمن
لما كنت حلوة وصبيه
كنت في الغيط بميت راجل
كنت في الموال بهيه
كنت بترضعينا الحنان
ولقمتك حلوة وطريه
كنت يوم إنت السند
وانت الملاز وانت العطيه
كانوا يسموك ب جبين
وتأكلينا من حلال
البياض ناصع مضوي
والحمار معبي الجبين
واللي يعرف عن شموخك
يقول دا درب م الخيال
مسكتك بالفاس وعزمك
بألف واحد م الرجال
كنتِ تتوضي لصلاتك
وترصي كل العيال
لجل نعرف الإيمان
والله يا امه
انت لسه زي الشمس
ساطعه نورك ع الحيطان
والمفارش في ألمندرا متوضبه
والمصاطب والبيبان
كله زي الفل ياامه
حتى حجرة الحوان
والنور بتاعك
فارد عواطفه علي عتاب الجيران
وبطلتك والابتسامة
حلوة والله
لسه شايفك عود مزهزه
الصبا وَيَا الجمال
والعبير اللي ف كلامك
شهدة آيات الحسان
شايلة علي كتافك زهورنا الصغار
تزقزق الطيور من طله منك
علي شجر الغيطان
فاكرا ياامه واحنا صغيرين
كنت بتحمينا
واحنا من الخشا متقرفصين
تضحكي وتزغزغي
وترغي راسنا بالصابون
وتقولي والله كبرتوا يخزي العين
وكبرنا ياامه
والشعر الأبيض زاحف والسمار
والنصيحة دايما لينا
خلوا في قلوبكم عمار
والعيدان بدأوا يتأصفوا
وانت لسه بتدعي لينا
مع انك نايمة من سنين
تفتكري نسيبك
ليه
هو احنا مش بني آدمين
دا احنا عايشين في خيرك وبدعاكِ
وبنحلم والله نروح
في أي حته معاك
وفي قلوبنا ندعي
بعد الشر عنك يا ملاكِ
ياجنة ربنا ع الأرض
و ف رحاب قعدتك
ملايكة متسلطنين
من حديثك والحوار
ودايما تنصحينا
بالصلة وصون العرض
وحسن الجوار
وتقولي دايما
عايزا اشوف في قلوبكم الخضار
والله يا امه لو بإيدي
لشيلك والف بيك واطوف
وامسح دموعك ياغاليه
واقول للي من بعدي أتعلم وشوف
هي دى الأم
الحنان والطيبة وبدون اختيار
انت الخير والبركة
انت ست الدار
بقلم /فتحى نجم المنصورة
الثلاثاء 31/12/2019
كل الناس تحتفل بعام مضي وعام آت وأنا أحتفل بأمي
*ربي يحفظ أمي ويشفيها وأمهات الكون*
