قصيدتي الجديدة
(عمدة بلدنا )بعد توثيقها
قالو كلب العمدة مات
بسرعه نجري نعزي فيه
عمدة بلدنا لما مات
ماحد فينا سأل عليه
لو مرة يمشي وسطنا
الكل كان بيبوس أيديه
ولما اخده ربنا
في داهية غير مأسوف عليه
كان مفتري وعبد القوي
ولا حد يقدر يشتكيه
ولو نفكر نشتكي
هو احنا ليهم نسوي ايه
لو حد يوم يعمل دكر
يتمد ابوه قدام عنيه
ويلبسوه كل التهم
ويشهدو الدنيا عليه
ويدخلوه جو القفص
مع الكلاب تعض فيه
العمدة حاكم البلد
والكل حواليه بيراضيه
هو القانون والمحكمة
وتمللي يلعب بالجنيه
لو حد طرفه يوم ظلم
بيعاقب المجني عليه
اهو مات وراح لربنا
قدامه عمله هيلاقيه
ويشيل حسابنا كلنا
وبعمله ربه هيجازيه
.......................
الارض جفت من زمان
والدودة طلعت في الغيطان
والحدوة وقعت من الحصان
والسمك قايم بيجري
لاجل يهرب من الحيتان
ساب غريب يقتل اخوه
علشان يعيش هو في امان
ساب الحبايب كلهم
وارتمي في حضن الشيطان
باع الشهامة والرجولة
حتي سيفه والحصان
خلي صاحب الارض يجري
يرمي نفسه في البحار
لأجل لقمة عيش ياكلها
كلها ذل وهوان
الحرامي يزيد رصيده
والشريف عنده يهان
ضلمت عين العدالة
حتي مالت بالميزان
الاراضي جردوها
المصانع خربوها
يسرقوها ويلعنوها
علموني اعيش جبان
اغض بصري عن الفساد
شمعو ليا الودان
لو في مرة احاول انطق
يقطعو مني اللسان
عمدة مات وعمدة جاي
يارب عديها بسلام
.....
رضا ابو شنب
مصر/ المنصورة/ ميت غمر
٠٦/٠٩/٢٠١٨
ليست هناك تعليقات:
إرسال تعليق