هذه القصيده بعنوان علاش يا لبحر وهي بالعاميه المغربية
علاش يا لبحر
علاش كثر فيك لغدر
حلم الإنسان فيك تبخر
وقلب لميمة على ولدها تقهر
من بعد ما كان يتمنى
الشك الاخر يعبر
عيات ما تسنى عيات بالصبر
تصلي وتدعي الله
في كل عشية وفي كل صباح وفي كل فجر
إيه يا لبحر تحولات فيك الطريق للحريق
وصار الإنسان فيك غريق
هزو الما وكلاه الحوت
غدراتو قوارب الموت
السفينه اللي داتو تحولات لتابوت
الامواج اللي تاق فيها خدعاتو
والشط الآخر رماتو
ماعتقاتو ما رحماتو
علاش يا لبحر علاش وليت بحال الزمان
ما ليك تقة مالك امان
تغدر وتخون.
ما رحمتي الإنسان
وبكيتي العيون
شحال تغناو بك الشعراء
وشحال صيدو فيك لبحارة
يا خسارة عليك يا لبحر يا خسارة
كن كنت يا لبحر تهضر وتتكلم
كن عرفت سر من سرارك
سعى انت يا لبحر اخرس واصم.
تحتاج اللي يسبر اغوارك
امواجك العالية
ورياحك العاتية
شحال خلات من قلوب دامية
وعيون باكية
شحال غرقتي من سفينه
وخليت القلوب غبينة
يا لبحر مرة تكون عادي ساكن هادي
يصيبك الفتور
ومرة تغضب تهيج تتور
بحالك غير راضي
إيه يا لبحر شحال من واحد ردتيه مشهور
وشحال من قلب دميتيه وجعلتيه مقهور
وشحال من واحد تاق فيك
وصابو الغرور
سعى انت يا لبحر
خدعتيه وطعنتيه في الظهر
علاش يا لبحر
علاش يا لبحر
بقلم الدويدة عبد الرزاق
ليست هناك تعليقات:
إرسال تعليق