بدور عليكي و نفسي اشوفك
و المس كفوفك ساعة السلام
بدور عليكي و رغم السنين
لسه الحنين وباقي كلام
لسه ف بالي حلوه بضفاير
شايله كتابها تحت المطر ..
شوفتك يوميها كنتي هتقعي
لكن ساعتها ربك ستر
ضحكت عليكي ولما عنيكي
بصت عليا قلبي انفطر
خصله جميله م الطرحه بانت
و كانت بدايه لاجمل غرام
*********************
حاولت بشده ... بعت جواب
جوه الكتاب ف حصة علوم
فاكرك ساعتها بصيتي بصه
و اخر الحصه معرفتش اقوم
خوفت عليا ل تضيعي مني
حسيت كأني بنص الهدوم
لكن لقيتك بنص ابتسامه
كانت علامه من غير كلام
و كبرنا سوا ولسه الهوي
مالي القلوب...........
عاشق بحبك و هفضل احبك
هافضل بدوب............
بس الظروف ملعون ابوها
قالولي في ناس ...
رايحين يخطبوها ..
وانا ..... يادوب
و روحتي حبيبتي مني قوام
و رغم السنين باقي الغرام
و دلوقتي ..
بدور عليكي و نفسي اشوفك
والمس كفوفك ساعة السلام
بدور عليكي و رغم السنين
لسه الحنين و باقي كلام
سيد صادق
ليست هناك تعليقات:
إرسال تعليق