فشر الحريم
فشارين بعض الحريم
ومرعين مرع خطير
كيدين فشر الشيطان
بالمقارنة يبقى أمير
جوزى من دلعه يجيبلى
الفطار على السرير
والغدا دليفرى وشرفك
والعشا ريستوران كبير
لو طلبت طلب يجيبه
جوزى بصراحة امير
الهدايا على كل نوع
من الدهب حتى الحرير
زى خاتم فى صباعى
وانا اللى اتصرف وادير
الكلام والرأى رأيى واللى
أقول له عليه يصير
هو طوع وكيوت ومهدي
وحنين و قلبه كبير
والحريم التانيه تسمع
الكلام ده عقولها تطير
يندبوا الجوز المرازى
والمنيل والحظ العسير
وقعة سودة كانت الجوازة
والمعامله كما الحمير
مستحملاه هو وعيلته من
الصغير حتى للكبير
الا عمره ماجبلى وردة
أو عزمنى على عصير
نافش ريشه وداخل باتنين
كيلو جوافة بالكتير
بس هات ياشخط ونطر
فيا وعاملى فيها مدير
والخناق لازم يوماتى
والمشاكل عالطول يثير
والحقيقة اللى بتفشر
دى مكايدة يا حريم
قاعدة بدارى فى خيبتها
أن كيدهن عظيم
والحقيقة
أن الرجال هم الرجال
والحريم هن الحريم
والبيوت مدارية ياما
و مافيها بيت سليم
الشاعر / عبد المنعم حمدى رضوان
(طعم تانى)
دمياط فى٣٠يناير٢٠٢٠
ليست هناك تعليقات:
إرسال تعليق