الحب الحياه
الشاعر : ميشيل رزق الله
إفتكرت ان ف عواطفك شئ جديد
شئ يخلّي الدنيا تبقى بمعنى تاني
شئ يحسس قلبي إنه بيك سعيد
يدّي معنى أحلى من كل المعاني
كان في نفسي ان انت تبقى حاجه تانيه
حُب أحلى م اللي عدّى كتير عليّ
بس حُبّك رغم ما قولته وعملته
لسّه مش قادر يحرّك حاجه فيّ
نفسي احس انك بتديني الحياه
نفسي اشوفك القى عقلي مني تاه
والقى جُبّك وابقى أقرب من سماه
هو دا الحب الحقيقي .. هو دا الحب الحياه
شوف آهاتي .. شوف عيوني
شوف هوايا ازاي عملته من جنوني
حتى وانت بعيد عليّ
بابقى خايف من دموعي ومن ظنوني
شوف وساعة ما ابقى جانبك بابقى أيه
بابقى مش دريان بروحي عامله أيه
والا ليه الشوق قاتلني
واقعد اسأل نفسي .. ليه ؟
شوف حنيني .. شوف انيني
شوف يا روحي ازاي باكون
نفسي احس انك معايا
وان قلبك يوم حنون
قد أيه الحب أجمل لما يبقى فيه حنين
نسمع الضحكه نقابلها بكل شوق
لما يدّي دقه حلوه تبقى عايشه للسنين
نلمح النجمه نمد ايدينا فوق
نخطف الحلم اللي ييجي .. نجري بيه ونحققه
واللي ماعرفش المحبه .. ييجي واحنا نشوّقه
هو أيه الحب يعني غير كده
همسه حلوه .. ضحكه حلوه .. مش كده ؟
يا حبيبي .. وافتكرت انك حبيبي
قلت يمكن ييجي يوم الحب يكبر
وافتكرت انك فاهمني أو داري بي
إلتقيت ان ف طريقنا جرح أكبر
أو بيتهيألي إنه وهم جاني
وانتظاري ليك وحيرتي من عنادك
وان قلبك لسه فيه حاجه لزماني
بس أحزاني خدتني من بعادك
نفسي بُعدك يبقى وهم
نفسي تيجي ويّا حلم
نفسي احس انك بتدّيني الحياه
نفسي اشوفك ألقى عقلي مني تاه
والقى حُبك وابقى أقرب من سماه
هو دا الحب الحقيقي .. هو دا الحب الحياه
ليست هناك تعليقات:
إرسال تعليق