ذكري رحيل الزعيم
بقلم صلاح منير
على سريري ساعة عصاري
ماسك بايدي كتاب بقراه
قلت يمكن يجي النوم بعيني
أول ما لاعب النوم جفوني
سمعت صوت جرس تليفوني
رديت لقيت صديقي بصوت ملهوف
بيقول لي اصحى يا بني قوم
شغل الراديو أو التليفزيون
فيه في البلد شئ مش مفهوم
شغلت تلفزيوني وعنيا فيها النوم
مرشات عسكرية وقرآن طول اليوم
قلت فيه ايه في البلد يا جدعان
طلع المذيع بيقول انتظروا بيان
العقل ودا وجاب وقلبي ملاه الخوف
قعدت ساعات منتظر خايف قلقان
طلع السادات بدموعه يلقي البيان
وسمعت اللي عمره ما كان ع البال
قال بنعي لكل العرب زعيمهم جمال
مات البطل على سريره موتة رجال
أهلكت قلبه المهام الوطنية الثقال
مات بعد أن حقق الصلح المحال
بالمطار ودعت أخوتك يا جمال
وداع أخير لم يرد لهم على بال
نؤمن أن الموت قدر منعه محال
لكن الفراق يحمل أحزان عضال
اليتم صاب العرب يا أشجع الرجال
بعد رحيلك تفرق الأخوة وساء الحال
دمعي ما جف عليك لليوم يا جمال
صلاح منير
مصر
ليست هناك تعليقات:
إرسال تعليق