(((عصفور زقزق )))
____________________
عصفور زقزق على شباكي
صاحي يسبح م الفجرية
جاي بيقول بعدين وياكي
حد ينام كدا للضهرية
يللا ياحلوة صحي النوم
نبدأ يومنا نشاط وعمل
هو العمر فيه كام يوم
علشان بتقضيه فى كسل
والزقزقة كانت بشويش
لما سمعتها دوغري صحيت
هز جناحه نفش الريش
جاب نسمايا جوا البيت
قولتله روح الله يجازيك
ليه طيرت النوم من عيني
كنت انا بحلم بعريس شيك
جاي يسعدني ويهنيني.
جاب فستان أبيض مع طرحة
وصحبة ورد جميلة ندية
قلبي انا نط أوام م الفرحة
علشان شوفته أغلى هدية
ولقيت نفسي أوام فى الزفة
روحت مزقزق أوي صحتني
ضيعت لي من إيدي الدفة
غور وياريتك كنت ماجيتني
___________________
بقلم / زينب سليم أحمد
ليست هناك تعليقات:
إرسال تعليق