امسكوا الايام
عماله تجرى مننا
والعمر سابق سننا
واليوم مالوش
ف الزمن اى لزوم
والشهر سبق السبوع
حتى السنه متمسكنه
علشان بتجرى لوحدها
من غير حساب
ولا عارفه امتى
يكون الرجوع
حتى الساعات
مابقيتش احب لبسها
عشان عايزها
تقولى ع الايام
وهيه ماشيه....لوحدها
بالدقايق والثوانى
ودا وقت مالهوش
عندى طلب
امسكوا الايام
عماله تجرى مننا
وعملنا فيها ايه
يغضب ويرضى ربنا
لازم نحاسب نفسنا
قبل الحساب مايذلنا
ونضيع الباقى ف عمرنا
كله ف اثام او ' ذنوب
لازم نتوب
قبل التراب مايضمنا
وازرع شجر وازرع ثمر
ازرع زهور
ازرع وخلى زرعتك
اكل الخلائق والطيور
ازرع الخير والسلام
وامسكوا الايام
عماله تجرى مننا
من غير سلام
علشان مازهقت مننا
سعيد عزب
ليست هناك تعليقات:
إرسال تعليق