قصيدة
( المتسنجلاتي )
قصيدة عامية
العنوان متزخرف وشيك
بروحي أشتريك
وحَط اسمه بين قوسين
جدير بالثقة
وكلمتين متزرقين
وكام صورة دعاء
وشمس طالعة مشقشقة
والفيس بيحدف بلاوي
صاحبنا متسنجل وغاوي
والبت كاتبة مُطلقة
والصفحة عامة
والصفحة لمة
والمشاعر بالألوف مِتبعزقة
والصورة حِتة بُندقة
والباشا إنسان فلاتي
مبصبصاتي
خبير في عِلم البحَلقة
البت حلوة وكيوت
والبت حاطة الشروط
الخاص ممنوع يا سادة
ورغم إنه حساس زيادة
والحساسة عنده مدلدقة
والخاص دا حسب الظروف
وعن خبرة جرب يشوف
بعت الطلب
ووراه رسالة مزوقة
ألف شكر على القبول
جَس نبض
تقدر تقول
وحبة حبة نال قبول
والحكاية مبهوأة
ساعات هيام
وساعات غرام
وساعات خصام
وهو صدق إنه صدق
وهي برضو مصدقة
بقينا في الحياة أرقام
وبنلعب بالقلوب كورة
وف حضن الشيطان بنام
وناخد معاه صورة
مشاعرنا حسب رنة
ونسينا مبادئنا
يارب سامحنا
وانصرنا على روحنا
أه يا زمن
فيك العجب بالكوم
شياطين في صورة بشر
وديابة لابسه هدوم
عايشنها كدب في كدب
عشش صدورنا البووم
لا وعظ بقى ينفع
ولا خيرنا عاد بيدوم
اللهم لا تؤاخذنا
قبل متوصل الحلقوم
كلمات
أسامة أحمد رفعت
ليست هناك تعليقات:
إرسال تعليق