حكاية قلم ( من شعر العامية المصرية )/ ايمن الشهابى
===================================
قالولى مال القلم
قلت القلم حيران
ساكن فى حضن الورق
مااعرفش ليه زعلان
بيغنى ويه الورق
ويدندن الزكريات
ويقول عليه انكتب
أكتب حاجات وحاجات
عاش القلم أو مات
مقطوع من البستان
إديتكوا عمرى يابشر
ورميتوا قلبى إنكسر
الكلمه دى كلمتى
مش كلمة اللى سطر
وإنتوا قلوبكم حجر
تقسى وتنسى ماكان
قالولى مال القلم
قلت القلم زعلان
قلب القلم مجروح
والجرح فيه نازف
سن القلم مشروخ
وبدمه بيجازف
يمكن ماهوش عارف
معنى الحياه والزمان
قالولى مال القلم
قلت القلم زعلان
ظلمتوا ليه القلم
وكسرتوا حبه الوحيد
آهٍ يادمعة ندم
تصهر قلوب الحديد
تبصوا ليه لبعيد
وتسيبوا روح إنسان
قالولى مال القلم
قلت القلم زعلان
حبر القلم دمى
وقلبه ده حلمى
حتى هوى المحبوب
مكتوب عليه إسمى
وإزاى يروح همى
وانا ماليش عنوان
قالولى مال القلم
قلت القلم زعلان
******************
شعر/ ايمن الشهابى
مصر
من ديوان أغانى الحب والالم
ليست هناك تعليقات:
إرسال تعليق