عشمان ياإلهى في كرمك
احج واطوف بالكعبه وآلبى
واطهر روحي وقلبي
وتصفح عني وتقبل حجى
وحج حبيبي
بحق م نورك مالي حشايا يا ربي
كان نفسي أبقي معاهم زي
ما لبوا ألبي
يا ملاذي وقصدي وفارج همي
أنا حلمي أطوف بالكعبه
وأسعي ما بين الصفا والمروة
وارفع ايدي واقول سبحانك
سترك ياعظيم الستر وإحسانك
أيوه خدتني الدنيا ويمكن
يكون ذنبي أكبر م الأرض
كل يقيني بإنك أكبر
من كل معاصي الأرض
وذنوب الناس اللي علي الأرض
أنا تايب قاري في قرآنك
إنك قابل توبة عبدك
بس يقول غفرانك
يعمل بكتابك فيخاف من عصيانك
وإنت الغفار وإنت القادر سبحانك
اجعل لي نصيب من إحسانك وأطوف بالكعبة
واسعي ما بين الصفا والمروة
وأشرب زمزم خيرك
إنت اللي كافيني بخيرك
وهديني طريق الخير
وفاتحلي ببان التوبة بتقديرك
نظرة عفو تخلى شقايا نعيم
وشيطاني رجيم
وتخلي القلب الصخر رحيم
أرحم من أم علي المولود
يا سميع يا بصير يا ودود
الكل لو عاش ألفين سنة فاني
وإنت الموجود
أنت الباقي الموجود
وبأمرك كون فيكون
العاصي يعود
ويعاهدك يبقي الزاد للآخرة
ركوع وسجود
وندم علي الذنب
وخوف من وقفة ف يوم مشهود
يا رب اغفرلي بأمرك كن فيكون
فتنتني الدنيا
وكل الدنيا وناسها ومالها عليا يهون
إلا كتابك
عمره ف يوم ما عليا يهون
وانا تايب راجع ذنوبي
وواخد علي نفسي عهود
وقايل لها توبي
مليش من غيرك
رحمة وصفح ولطف
بحق جلالك
تصفح عني وتغفرلي ذنوبي
بقلم الشاعر السيد العبد
ليست هناك تعليقات:
إرسال تعليق