قلب حر (493)
............
بدارى ليه
من اللي إنقضى
وبقى ماضي ذكرى
ولا عدت عاوزه أفتكر
ليه نساني بكرة ..
محبوسه بين صمت الشجن
والليل بطوله
وقلب خايف يتوجع
من شوك غصونه
ياما وعدني بالحنان
بان حضنه جافي
والشوق بيهرب من لقاه وهناه ليه قاسي
لا الدمعه بتخفف جراح
ولا قلبي ناسي
بحلم يعود بيا الزمان
ولا أحب تاني
وترد روحي من ليالي
شوق أناني ..
وألبس في ثوب
عطر الأمل
وتطيب جروحي
وأنادي بكرة أنا هنا
مات فيا خوفي
ووداع يا قلب ماحسنيش
بقى ماضي ذكرى
وسماح يا بكرة اللي إتظلم كما كنت فاكرة
ووعد مني أكون أنا
ولا ضل تاني
حره ما بين أرض وسما
وأعيش زماني
وأفرد ضفايري فى ليل
سهر على ضوء أماني
بقلم .. صبري رسلان
ليست هناك تعليقات:
إرسال تعليق