فاكرانى يا مدينتى ( من شعر العامية المصرية )
==============================
لإمتى يامدينتى
هتفضلى بعيده
وفيكى حته منى
عايشه هناك وحيده
شوفى الليالى خطفت
من عمرى كام سنه
باين فى نحت وشى
وفضهرى اللى انحنى
و فشعر راسى لما
يقع تقع سنه
شوفى عدت يا مدينتى
من عمرى كام سنه
لإمتى يامدينتى
هافضل هنا غريب
ف بلاد وخدانى منك
ومن أغلى حبيب
ياريت العمر يطول
وأرجعلك عن قريب
بس إوعى تنسى إنى
ليه فى حضنك حبيب
فاكرانى يامدينتى
ولا نسيتى اللى غاب
فاكره اللى لف أرضك
ودق كل باب
أنا فاكر الشوارع
وشلة الصحاب
وضحكة كل واحد
وفرحة الشباب
فاكرانا يامدينتى
ولا نسيتى اللى فات
لسه النيل جنب منك
فاكر يوم التلات
وتلات شبان بتحلم
تسبق كل الساعات
كان فيهم واد حليوه
بقى فينا ذكريات
على كتفه بتضوى نجمه
لكن تحت التراب
والكتف التانى نسمه
وخداه فوق السحاب
يا احمد كان نفسى أشوفك
بس القدر غلاب
آه منك يامدينتى
يا مفرقه الأحباب
خدينى يا مدينتى
غاب مالدنيا الأمان
خايف من نده تيجى
يتغير المكان
أتوه مارجعش تانى
على جناح الزمان
ضمينى يامدينتى
قبل فوات الأوان
***************
أشعار/ ايمن الشهابى
مصر
من ديوان أغانى الحب والالم
ليست هناك تعليقات:
إرسال تعليق