بالعامية المصرية ( بترجع ليه)...
بترجع ليه تكلِّمني
وتفتح جوه قلبي جروح
جفاك والبعد علِّمني
أدوس ع الشوك وأخطي و أروح
أعيش العمر خالي البال
كأني وليد بقلب جديد
لا داق المر من غدرك
وشبَّاكه وبابه حديد
بترجع ليه تكلِّمني
وتفتح جوه قلبي جروح
أنا ما بقتش ملك إيديك
ولا في عينيك كتاب مفتوح
أنا سكَّرت باب قلبي
ومفتاحه رميته بعيد
لاعاد القرب يفرحني
ولا الضحكة ولا المواعيد
بترجع ليه تكلِّمني
وتفتح جوه قلبي جروح
ياريت تبعد وتنساني
عشان طير الوصال مدبوح
قتلت الفرحة في عيونه
و عيشته الغرام تنهيد
ما كان طاير وله جناحات
خنقته زمان بكف الإيد
بترجع ليه تكلِّمني
وتفتح جوه قلبي جروح
يا أول سطر في كتابي
أنا مش ليك بكل وضوح
أنا عايش على الذِّكرى
وذكرى الغدر نار بتقيد
بلاش نسرح مع الماضي
ونرجع تاني م المواليد
بقلمي حازم قطب
ليست هناك تعليقات:
إرسال تعليق