ياشهرزاد ( من شعر العامية المصرية )
========================
ياشهرزاد فات المعاد
الفجر نور والصبح قاد
وشهريار شاف النهار
وحبك إنتى ياشهرزاد
دا إنتى الملاك اللى ف قلبه
وإنتى الحياه اللى ف نبضه
خليه ينام على نار حبه
ويعرف إن الهوى بالكاد
حكاويكى سحرت أيامه
واتمكنت من أحلامه
وإزاى يشوفك قدامه
ولا ينكويش بلهيب منقاد
ياشهرزاد فات المعاد
الفجر نور والصبح قاد
خليتى قلبه يبات مغلوب
يدوب على الأشواق ويدوب
ويقول هاعيش للحب وأتوب
وأشوف سعادتى اليوم بمعاد
دا الحب عفريت شد البال
والقلب طب ف سحر خيال
وشهريار لو صال أو جال
يرجع وقلبه بحبك زاد
ياشهرزاد فات المعاد
الفجر نور والصبح قاد
وشهريار شاف النهار
وحبك إنتى ياشهرزاد
********************
أشعار/ ايمن الشهابى
مصر
من ديوان أغانى الحب والالم
ليست هناك تعليقات:
إرسال تعليق