مُرجيحه ( من شعر العامية المصرية )
=========================
مرجحنا ومرجح مرجحنا
خليها تفوت وتريحنا
ماهى دنيا ولازم تجرحنا
وتمرجحنا... وتجرحنا
مُرجيحه الدنيا يا أستاذ
والعصر دا نِت وهزاز
وإنت من عصر التلفاز
واقف بتعاند أيامنا
مرجيحه الدنيا يابهوات
ميت فل عليكوا يا قفوات
تسرقوا أحلام الأُلفات
وتدوسوا وتمشوا فى مجاريحنا
مُرجيحه الدنيا يا باشاوات
زينا زيكوا فى عرفات
بنصلى وندعى الدعوات
وبترجعوا تنهبوا خيراتنا
مُرجيحه الدنيا يا مولانا
الدين مش ماشى على هوانا
الدين دا راسخ جوانا
ولا يتبددش ولا بموتنا
لِسانا يا أُمه بنتهجى
فى حروف الدنياونترجى
بنى آدم بيموت فى الفكه
عايز يتحكم فى قواتنا
وإحنا اللى وقفنا لأيامنا
ورمينا عشانك أحلامنا
وحلفنا نرجع أفرحنا
دوبنا و فى الحزن إتمرجحنا
الظلمه قتلونا وفِضلوا
بالغدر عليكى بيتفاضلوا
وإحنا اللى وقفنا وعدينا
وياكى الصعب وخطينا
إحنا اللى وقفنا لأعادينا
ورفعنا جبينك بإيدينا
ضربتنا الدنيا برجليها
دوبنا وفى الحزن إتمرجحنا
وإتجرحنا... ولاإرتاحنا
****************
أشعار/ أيمن الشهابى
مصر
من ديوان أغانى الحب والالم
ليست هناك تعليقات:
إرسال تعليق