ما اقولكيش يا اسكندرية
ــــــــــــــــــــــــــــــــــــــــــــ
د خالد الزغيبي
آه لما بتنحتى على وسطك ملاية .. اللف
واما عطرك الفللي بعد العصاري من دون الورود .. بيهف
والا لما تبعتى غمزة من ورا اليشمك .. شقية
وآه لما ينام على أوصتك من التل .. شطرين
وترسم رشاقة خطاويكى في نغاشيش القلوب ..حرفين
وتنتشر الحكاوى بين القهاوى عن دلالك يا .. صبية
وآه لما بتطل عينك من ورا سحر الرموش في .. نسايم العصر
ولما تروى بشرباتك شوق الشوارع عند سوق الخيط خلف .. شارع النصر
ولما كل العيون تبقى وراكى زى ما تقول .. امشجية
وآه لما بتستحى أما بيقولوا .. عروس
والا لما يردد اسمك اى بياع .. عرق سوس
بيبان على خدودك عصير العتق زى لون .. المشربية
ما اقولكيش يا سكندرية
مش حأقول فوق شوقى حاجة
ومش حأعيد على عشقى حاجة
أنت عاجنة وانتى خابزة كل حاجة
أقوللك أيه وأعيدلك أيه :
هو قبلك كان في حاجة
والا بعدك حتبقى حاجة
ما انتى فاهمة كل حاجة
يا معجبانية وشقية .. يا اسكندرية
ليست هناك تعليقات:
إرسال تعليق