لمحبة بالغذر
معروف أراسي بالوفا
صبار ؤ صبرك غالي
قصتي مع لولف قصة
ؤ ليه أعطيت حياتي
ثقت انا ف لمحبة
ورسمتها لوحة ف خيالي
اداني لوهام
قلت هي زهري
هادي بنت الاصل
معها ينبت غرسي
درت بكلام لجواد
ؤ عليه يجبر عظمي
ما كنت حاسب طريقي
اتعود حزان ؤ تزيد هوالي
ف طريقك حزت لفرح
ونسيت لجراح
قلت تكوني عمري
ميالك أمسرسب
تشوفي ف السحاب الغادي
ؤ علا الأرض ما ترضاي تعفطي
وانت سماك عطشانة
ؤ غمامك ما يوني
إاااااااايه يا راسي
ضاعت المعنى ف الجوف
وشكون يفهم كلامي
اليوم شاعت لخبار
ؤ عليك ضحك العادي والبادي
خديت من ليام قسام
ؤ درت من مداد يامي قطران
سرت نكتب علا زهري
عدت عايش بالتخمام
لي شفتو عرى عل السناني
انقول ديالي ؤ من هلي
مالك حاصدة لعداوة دارسة لخصام
ؤ بالكدوب عمرتي امطامري
ما حسنتي بعشرة نكرتي لحسان
قليلة نية عل الزمان تساومي
صبرك قليل ما تعرفي دوام
تكوي بالجمر ... والثلج عليه تسخني
حالك مدسوس تعشقي الظلام
ياك بالخير مديت ليك أيدي
علاش بالنفاق ضحكي ف لوجه
ؤ ف الظهر ناوية تعضي
هدا سعد لي ما عندو زهر
الربح ايعود ف يدو خسارة
ؤ لخطية عليه تبري
حسبت راسي
كسبت سرب من لحمام
ساعة هجرتي لوكر ما بغيتي ليه تولي
النية ؤ لغدر ما زادو توام
ؤ بديك النية غدى تخلصي
اعطيتك لمحبة قنطار
ؤ بالعار فيا رجعتي
لا تفرحي وتقول
قطعتي اوطى وجبال
و عليا تحكمي
النفس معدودة للرجال
ؤ للخالق حزت امري
العشرة عليها ليوم هانت
يا ربي زيدني الف صبر علا صبري
بقلم الزجال : محمد زرواني
الطير الحر
ليست هناك تعليقات:
إرسال تعليق