قصيدة باللهجة المحكية.
أعلاش تبكيني
اعلاش تبكيني يا الزمان
بغيت نقرأ ونتعلم
كيفي كيف ولد السلطان
كيفي كيف أولاد الحكام
جراو علي مالقاعة
قالوا أنا امسخ وعريان
الكرطابة كرطونة
والطعمية خبز وزيتونة
الله يأخذ فيكم الحق
أعلاش بكيتوني
ومالقاعة رميتوني
ع خاطر أنا فقير وبابا زوالي
ليام ادور يا مغرور
والفقر والصبر ربى الرجال
اليوم طبة أساتذة
كيفهم ما كاين محال
طلعوا للمريخ
هذا كلام واقع صحيح
شد صحيح واقرأ وتعلم
الهم يزول يا مغبون
غدوه تضحك
على ولد الحاكم والسلطان
الكرونة تزول والحاكم
يتقاعد يا مهبول
تولي أنت تصول وتجول
بالثقافة والعلوم
ترقى وتزيد يا مغبون
أصبر وتعلم
الفقر موش عيب
حتى شيء ما يدوم
اسمع كلامي يا وليدي
واذا ضربوك على الخد
دمعوا عينيك عمرك ما ترد
هز عينيك للرب
وعلى الخير عمرك ما تصد
اقرأ وتعلم
غدوة تكون ما كيفك حد
كلامك ما يترد
تولي أنت القاضي والا المعتمد
والكل عليك يعتمد
اقرا واصبر
الحال هذا ما يدوم
خوذ مني التجربة يا مغبون
مالضعف خوذ القوة
تعاند يحطموك
للزنقة يرموك
اقرأ وتعلم واشمتهم
قبل ما يشمتوك
كون أنت المتفوق يبغوك
ومنك يتعلموا الأخلاق يا خلوق
تولي أنت المحبوب وعليهم تفوق
في العلوم وفي الحقوق
اقرأ وتعلم واصبر على هم الزمان
يا وليدي هذا كلامي وهذا ما كان.
الدكتور مصطفى عماري
ليست هناك تعليقات:
إرسال تعليق