#الغربه
رضينا بالغربه .............
و الغربه مش راضيه.....
لعبة محسومة ...........
نهايتها ب القاضيه .......
واهمين نفسنا واهمين ..
و نقول اننا عايشين ....
ملعون ابو القرشين .....
طول ما الحياه فاضيه .
وجعنا .........
محدش حاسس بوجعنا ...
محدش فاضي بيسمعنا ...
لو بس زمنا يرجعنا .........
و الله ما نبعد شبرين
التحويشه ......
طلعت دخان ع الشيشه
و اتسرق العمر من العيشه
لو حد يشدلنا الفيشه ...
و يفوقنا حتي بقلمين
******************
ركبنا فوق ضهر الحوت.....
و صاحبنا و بقوه الموت......
و عملنا مع الجن مصالح......
و عملنا ف الغربه قرود ........
نطينا و عدينا سدود ........
و شربنا من البحر المالح.......
و نمنا ف الاوضه سبعات
و بكينا زي الستات ......
لو نسمع اغنيه لمصر
فاكرينا بنغرف و نلاقي
و اتارينا بنلف سواقي
م النجمه و لحد العصر
و فطرنا ف رمضان وحدينا
و كبيرنا نكلم اهالينا
نطمن مين مات و مامتش
و ندفن همنا و ننام .....
و بنصحي نلاقي الايام ....
واقفالنا و مبتتحركش
سيد صادق
ليست هناك تعليقات:
إرسال تعليق