( عند الإله ) ٪
عند الإله راحت حبيبتي المخلصه
راحت وسالت دمعتي صبح ومسا
كانت تدير الدفه في بحور الظلام
ولو يجور الموج بتبقى الريسه
ماكانتش بتخاف م اللي جي
ولا كات بتندم ع اللي راح
وساعة الجد بتشد الوتد
وتدوس وتمشي على الجراح
وكنت أحس بإنها ضهر وسند
وساعات أحس بإنها كل البلد
كانت قياده
وكت رياده
وكت بساطه
كت حزمه مجدوله بكبرياء صبر وجلد
عند الإله
راحت حبيبتي الطيبه
كانت دفا
كانت لقلبي قريبه
لو تعرفوا كان قد ايه حبي لها؟
تخيلوا
حب الطفوله والصبا
كات دنيتي
كات فرحتي
كانت حياه
كات إيد طبيب ساعة الألم
لو قلت آه
راحت حبيبتي
وما عنتش اسمع حسها
لكن مطمن قلبي إنها
عند الإله
لكن مطمن قلبي إنها
عند الإله
جمال زكي عينر
ليست هناك تعليقات:
إرسال تعليق