( سامحيني يا دره ) :
سامحيني يا دره
عيشتك بقت مره
في كل يوم ازمات
نفسي افوق مره
مش لاقي حاجة تلذ
ولا حلوة بالمرة
سامحيني يا دره
الذل ساقياني
من راسي لكعاني
مطلعه عيني
ومنشفه الجره
طب اعمل ايه تاني
يا بلدي يا حره
سامحينى يا دره
انا كنت باحلمبك
اعيش على ارضك
ولا عمري يوم ابدا
اشم غير وردك
انتي جبرتيني
اروح بلاد بره
سامحيني يا دره
لما انتي مانعانى
أزرع في غيطاني
هاستنى إيه منك
ما انتي اللى طارداني
من ارضنا الحرة
سامحيني يا دره
مش لاقي فيكي عيشي
وتقولي رايح فين ؟
مأصأصه ريشي
ومأروطه الجناحين
مضطر اشوف غيرك
حارمانا من خيرك
لا مال ولا شهرة
سامحيني يا درة
بلاش تلوميني
يا اغلى من عيني
إنتي غصبتيني
أهرب واسيب طيني
على إيه تحاسبيني
ده انا باشتغل سخره
سامحيني يا دره
عيشتك بقت مره
سامحيني يا دره
عيشتك بقت مره
بقلمي الشاعر جمال زكي عينر
ليست هناك تعليقات:
إرسال تعليق