( التوكتوك ) :
يا توكتوك إنت يا متكتك
على الطريق ماشي تتأنتك
بتخش من حارة لحارة
طاير كإنك طيارة
واخد في وشك كده على طول
ماليكش عرض ولا ليك طول
شمال يمين وبتتمخطر
وع الزبون كده تتمنظر
بتعدي من تحت الأتوبيس
وفي الزحام دايما بتهيص
مالاكشي حاكم ولا قوانين
حبة عيال همه السايقين
بس بصراحة إنت نافعنا
ومقضيين بيك مصالحنا
في الزنقه تطلع على الرصيف
وف ثانية تخلع عشان خفيف
بتلف من اضيق حارة
من غير ضجيج ولا زمارة
وأجرتك على قد الإيد
لا كريم واوبر ولا مواعيد
بس اللي ناقصك يا صغير
حبة امور كده تتغير
تخش في الدولة بتنظيم
وتبقى محسوب ع التقسيم
وما يسوقكش الا برخصه
والغلطة فيك تبقى بحبسه
ولا بد من لوحة بأرقام
وتبطل الزيطة والهوسة
عشان ما تبقى صح وسليم
والستر من رحمن رحيم
تروح شمال وتروح يمين
وتعدي من اجدع كمين
تروح شمال وتروح يمبن
وتعدي من اجدع كمين
بقلمي الشاعر جمال زكي عينر
ليست هناك تعليقات:
إرسال تعليق