راح تعمل ايه لو يوم لقيت
سيدنا النبي خبط عليك
وفتحت له بابك وشوفته
ومليت بنوره يوم عينيك
راح تعمل ايه لو يوم تحسه
او جيت في يوم وسمعت حسه
او كنت جنبه وبين ايديه
راح تعمل ايه
مشتاق اليه
لازم تكون مشتاق اليه
ما هو اصله برضه اشتاق اليك
ومن سنين خايف عليك
عايش في باله
من يوم رسالته
لحد يوم جبريل ما جاله
وخيره بين خلد دايم
وبين رفيق اعلى ناداله
وحتى يوم موقف عظيم
راح تلقى مين
غير النبي خايف عليك
الكل هيقول نفسى نفسي
وهو هيدور عليك
بالله عليك ..بالله عليك
لازم تحبه
علشان محدش يجي يوم يسبه
لازم تحبه
كفياك بقي
الحب مش دمع وبكي
الحب سنة واتباع
وطريق محبه اوله رحمة
واخره الاقتناع
وعشان كده تسمح لي اقولك
راح تعمل ايه
سؤال ولازم جوه قلبك
انك تجاوب يوم عليه
وعشان ما تلقى في يوم اجابته
اعرف نبيك وانصره
خليه امامك قدوتك
هو وصحابته
على نهجه سير
واوعاك تبطل يوم تغير
على سنته ..لازم تغير
وتعشقه بقلبك كتير
وان كنت عايز تلتقيه
على كوثره راح تلتقيه
تشرب بإيده وترتوى
شربه ما تعرف بعدها
ده بدعوه منه هتنتهي
وقفة ما تعرف حرها
الكل بيقول نفسى نفسي
والحبيب قال امتي
الكل تايه في الزحام
والحبيب قال سنتي
عضوا عليها بالنواجذ
علشان تعدى اي حاجز
خليك معاه
خليك وراه
وصل الف صلاة عليه
راح تلقى نفسك
عارف تمام راح تعمل ايه.
قصيدة (زارنا النبي)
من ديوان شط التمني
أمل صبرى
ليست هناك تعليقات:
إرسال تعليق