( ياللا نرفع الأيادي ) :
اللي فات اهو راح وعدى
اللي جي طب شكله ايه ؟
نفسى بالي مرة يهدى
وألقى كِتف أسند عليه
إبعدوا عني الخطر
هاتوا شمسي والقمر
هاتوا كل عيون جميلة
عايشة ليلها في السمر
نفسى اقتل اي دمعة
فوق عيون الحزن لامعة
نفسى اخلي كل ضحكة
للقلوب بالحب جامعة
اللي فات اهو راح زمانه
راح اوانه وراح مكانه
راح أساه وراحت همومه
ليه نقول كنا وكانوا ؟
اللي جي يمكن يكون
أحلى والأيام تهون
ياللا نخطف منه فرحة
ليه نسيء بيه الظنون ؟
ياللا نرفع الايادي
نبتديها من الساعادي
واللي ناوي إنه يعادينا
برضه لِيه مش راح نعادي
اللي ناوي إنه يعادينا
برضه لِيه مش راح نعادي
بقلمي الشاعر جمال زكي عينر
ليست هناك تعليقات:
إرسال تعليق