آخ يا ستي آخ
خذلونا بعد الوعد والكلام لكثير يا ستي
قالولنا اطلعوا خوف البارود والمدافع تدفنكو
واتاري البارود يا ستي ما هو برصاصة ولا بقناصة
البارود
حشوة دمار جوات القلب دحشوها خصاصة
وطينوا عليها يا ستي بدمي ودمع عيني الي ما نشفت عالغوالي
ولا الي راحو غدر وخيانة
وبعد هالعمر يا ستي جايه تعطيني مفتاح البيت
بدك تطمني على حوش البيت!!!
وكن الجاج!
والطابون بقاع الدار!
ما خلص.... راح البيت وراحت احجارة
هدمو الصور الي كان يحفظ اسرارة
وخلعو الزتونه والتينة وحرقو غماره
وهساع جايه تعطيني مفتاح البيت ودواره
هساع بدك البيت الي صار حواليه دمار وخراب دياره....
اسكتي يا ستي اسكتي
لا تزيدي من الوجع وجع
بحمد الله يا ستي ان رجليك ما بيحملوكي
وعيونك غابت الشمس منها
و ضاع السمع واخباره
حتى ما تشوفي الي شفناه...
ولا تسمعي الي عرفناه...
آخ يا ستي لو تعرفي
ان البيت الي بعبك مفتاحه...
صار تحت حصار
ومستوطن اخذ الدار
بدخل من غير لا احم ولا دستور
ولا اذن من إصحاب الدور
بدخل وبطلع عالكيف
واحنا نصبنا ورا لبواب
أشعار وعطر وبخور
وهساع جاي تعطيني مفتاح الدور....
لكن يا ستي ما نسينا ولا راح ننسى بيوم...
إن الوطن كيان
لا بد بيوم يرجع ونرّجِع إسم لجدود والدور....وتطلع الشمس علينا حتى لو كنا على حفاف لقبور..
#ندىالكلمات
ليست هناك تعليقات:
إرسال تعليق