فنجان قهوة
فنجان قهوة وأحلي صباح
صباح الحُب والأفراح
وجمال وجهك الوَضَّاح
بَراحِك علي الكون ضاحك وأحلي براح
فنجان قهوة بلونك نادي
بيداعب خيالي وينادي
ويجي عليا يميل
فنجانك وهمس عنيكي سكون الليل
فنجانك ورمشك حنينك وهمسك
وعاجبني
وسهم هواكي بقلبي صايبني
فنجان ونسماية وضحكاية بحكاية وغنواية
وانتي معايا قمراية وشمساية وضلاية ونسماية ورمش العين من أخر الكون دا جايبني
وحاببني
وشوق شوقك مدوبني
ونبض النبض بيصبني
فنجان قهوة و حكاية بنحكيها بقالنا سنين
وألف حنين
مع أحضانك وألوانك وأحلي جنون
فنجان قهوة سُكَّرُهْ زيادة
وعادة بتتمادا بأيات حُسْنِك
وبتمدد علي قلبي
وقلب القلب في قلبي
فنجانك
عشانك أعدي بحور
وألف وادور
واجيلك بقلبي في طبق بللور
عشانك من بنات الحور
وضي عنيكي بستان فيه كتير ألوان وطارح نور
ووردك علي خدك ولونه حُبُور
فايح روايح بأحلي عبير
فنجانك لسانك
وشهد كلامك فرح وسرور
ورمش عنيكي سحابة وغيم
رمش عنيكي محليكي
مخليني بيكي بَـ اهيم
بعيش بيكي وساكن فيكي مع الأيام
وادوب فيكي ياأحلي غرام
محمد صادق
٢٠٢٢/١٠/٢٢
٢٦٠
ليست هناك تعليقات:
إرسال تعليق