أنا الجاني :
انا الجانى ومجني عليه
انا اللي تاه مني زماني
ما اعرفش إمتى وفين الاقيه ؟
ما نسيته قبل ما ينساني
طول عمري جرحي بإيدي اداويه
ما احتجت أول ولا تاني
انا اللي زماني ورَّاني
هم وشقا وكُتر أسية
عمر الهنا ما ف يوم جاني
ولا عمري شفت الحنية
الحزن معمول علشاني
والدمع مخلوق لعينيَّا
حاولت اداري ف قلبي كتير
وادوس على الجرح ويأسي
واخلي حزني ف قلبى أسير
واصون معاه عزة نفسي
مابين ضلوعي في قلب كبير
ع الناس بصبَّح وِبمسِّي
يارب تهدي لي الأحوال
إنت اللي عالم بأموري
لا عندي جاه ولا غاوي المال
ولا منتظر في الهوى دوري
كل اللي طالبه أنا راحة البال
يا دنيا حِلِّي بقى وغوري
كل اللي طالبه أنا راحة البال
يا دنيا حِلِّي بقى وغوري
بقلمي الشاعر جمال زكي عينر
ليست هناك تعليقات:
إرسال تعليق