رباعيات بالعامية على بحر الرمل
كان زمان الجو صافي
كنتِ ع البنيان تخافي
كنتِ ساري في السفينة
والهوى في القلب دافي
إيه جرى شقلب كيانِكْ
ايه جرى زعزع أمانِكْ
أنتِ ليه قاعدة تِهِدِّي
أنتِ فاكرة قلبي خانِكْ
لو غرامي مِنْ لساني
مش مِزرَّع مِنْ كياني
جهِّزي فاسك و هِدِّي
واحفري قبر الأماني
هِدِّي في البنيان كمان
واخلعي حلق البيبان
نادي ع الغربان بحرقة
مش راح ابكي ع اللي كان
هِدِّي في البنيان وعَدِّي
فوق جراحي و هِدِّي هِدِّي
خرَّبي الجدران وفوتي
واعرفي ان ما حد قدِّي
هِدِّي في البنيان وشوفي
كام عمود زرعت كفوفي
عزمي أقوي م الزمان
والأسد ما عرفش خوفي
هِدِّي في البنيان وعيدي
في الهَدَد على عَد إيدي
شعللي نار القسية
وان بكيت هادبح وريدي
هِدِّي في البنيان يا جاحدة
ما أنتِ جوه القلب قاعدة
برضه مش هاقدر أخونك
ده الإبل مِنْ صبري واخدة
هِدِّي هِدِّي ما أنتِ روحي
حطي ملحك فوق جروحي
واخلعي جدر المودة
وان زعلتي مني روحي
بقلمي حازم قطب
ليست هناك تعليقات:
إرسال تعليق