{{ مسيرها تتعدل }}
===============
في دنيا حالها متبدل
ياقلبي ليه بتتعجل ؟؟
وبتأمن لكل الناس ..!!
وقولت مسيرها تتعدل
وبان لك . . أن أحبابك
ولا حسوا ،، بإيه صابك
وف الشدة م سألوا عليك
ومش فارق بقى غيابك
ياقلبي كفاية بقى طيبة
بلا حنية . . بلا خيبة
بتتحمل اذاهم ليه ؟؟
مادام في الغدر لاعيبة
وبنصح فيك ولا بتسمع
ينادوا عليك أوام ترجع
ولا اتعلمت مللي فات
وعارف قرصته بتوجع
سايبهم يلوا فــ دراعك
ويتسلوا . . . بأوجاعك
بتشكي ليه من الأيام ؟؟
ماهونت ساهمت فــ خداعك
ياقلبي فوق بقى كفاية
ليه تعمل قصة ورواية؟؟
واقولك بص قدامك .!!!
تقول دول فرحي وهنايا
===================
بقلم / زينب سليم أحمد ✍️
ليست هناك تعليقات:
إرسال تعليق