الوقت فات (بالعامية المصرية)
بقلم الأديبة والشاعرة والكاتبة الصحفية
حنان فاروق العجمي
الوقت فات
إن أفتح للدنيا باب
إني أعيش وسط الصحاب
إن يكون لي ف يوم أحباب
أو أفرش ورد على الأعتاب
إن عنيا تشوف غير الضباب
ودقات قلبي تخَبَّط على غير العادة
إني أرجع من تاني الطريق
أو أصدَّق إن للقمر بريق
إني أمسح ذكرى بتبكي بزيادة
إني أودع كل ضيق
أو أفرح وأشجع الأحرار ف فريق
ومنين تيجي الراحة
لما العذاب يبقى عبادة
ويتملي كاس الحسرة ويضيق
والوحدة تصبح أوفى صديق
من إمتى كانت الصحبة
خالية من مصلحة وإفادة
يا دنيا كل اللي فيكِ أغراب
عمرنا ما هنفتح يوم للحب باب
ولا نآمن لأي زاير لَيطلع قلَّاب
كم من غادر عدَّى علينا
وكان للشر جلَّاب
الحظ فارقنا يأس منَّا
سابنا وراح طاير
وقعدنا نِجدِل بإدينا الهم ضفاير
نكتب على أوراق الشجر
ونشكي لكل حجر
نستعيذ بالله من بني آدم كداب
كان ف يوم يهابنا
ويعمل لوجودنا ألف حساب وحساب
لبس توب مش توبُه
صاحب كل خاين
ومعدش ينفع معاه عتاب
بالوقت هتدبل أحزانا
لكن الثقة ف البشر معدومة
وإحساس الخير جوانا داب
الروح فينا بقت مصدومة
والأمان حوالينا غاب
ليست هناك تعليقات:
إرسال تعليق