صديق الشمس
***********
طالع برَّه
في عز الحر
ادخل جوه
يللا يا عم
قال لي انجَّر
لافيني القَّلة
يا ابن الضِّلَّة
وشوف لك أوضة
وفيها اتلم
يللي خدودك
بيضة وحمرا
وزي الدم
أنا والشمس
عشنا حبايب
عشت معاها
كل طفولتي
وحتى شبابي
وبقيت شايب
لو جت مرَّة
عليَّ بنورها
راح تلاقيني
شارب الرّايب
سمار الوش
وشكلي الدايب
وحتى الفاس
تاج ع الرَّاس
ماشي بيه وسط
الناس
إياك تتغر
أو من شغلك
يوم تتعَّر
خليك قايم نايم
بيه
واكتب شعرك
برده عليه
ومع الأيام
من شق الإيد
تطلع أحلام
اشقى عليها
وعافر فيها
لازم يوم هتنادي
عليك
عرقك ينزل خير
في إيديك
دياب محمود حسن
ليست هناك تعليقات:
إرسال تعليق