بالعامية ( المشهد زي ما شفته )....
قالوا بيدعوا لثورة جديدة
والمرَّة دي الحملة شديدة
قلت بلاش تسمعوا لكلمهم
واسمعوا مني حكم في قصيدة
هو صحيح الشعب هينزل
يغلط تاني ويخرَّبها
ما أنتوا نزلتوا زمان وخسرتوا
لمّا سمعتوا لنعق غُرَابها
فوقوا لروحكم وازرعوا فيها
يطرح نبت الخير في ترابها
مصر عفية ومش راح تركع
واللّي خَلِقها مش هيسبها
مصر عروسة ولسة صبية
بس يا عَمِّي بعافية شوية
بكرة تخف وترجع تاني
بحبّة صبر .... هتبقى قوية
حِبّوا بلدكم .... حاجوا عليها
وإياك يا ابني تخرَّبوا فيها
لحسن يرجع زمن الفوضى
تلاقي الناس قتلت بعضيها
نعوم في بحور من دم الشُّهدا
قُلّي ازاي هنعيش بعديها
آدي المشهد زي ما شفته
خراب ودمار من خوفي وصفته
لوحة حزينة وباين فيها
غيوم وضباب.. وأديكوا عرفتوا
بقلمي حازم قطب
ليست هناك تعليقات:
إرسال تعليق