هذه القصيدة كتبتها لزوجتي رحمة الله عليها حال حياتها ونشرتها يوم ٢ يناير ٢٠٢٠ ويروق لي أن أعيد نشرها مرةً أخرى .
( حبيبة قلبي ) :
حبيبة قلبي يا غاليه
يا شاغله ايامي الخاليه
ده من يومك وانا شايفك
حبيبتي وفي السما عاليه
وكنت اسهر انا ف ليلي
واغنيلك مواويلي
واروح للقمرة احلفها
واسال إمتى حتجيلي ؟
ولما جيتيني نورتي
وزاد نوري ف قناديلي
يبارك ربنا فيكي
لهمي وكربي بتشيلي
حبيبة قلبي يا هنايا
يا ساكنه قلبي وحشايا
ده لما بتبقي ويايا
بشوف فيكي تفاصيلي
حبيبة قلبي يا عمري
يا اغلى من سنين عمري
بإسم الحب اهديكي
ورود حبي ف مناديلي
ياريت الدنيا ترجع لي
وآجيلكو البيت انا واهلي
والاقي عينيكي تندهلي
تقوللي ارحم سهاد ليلي
وادفع مهر من تاني
وابدد بيكي احزاني
عروستي إنتي طول عمري
شموعي ف دربي ودليلي
حبيبة قلبي يا غاليه
يا شاغله أيامي الخاليه
ده من يومي وأنا شايفك
حبيبتي وفي السما عاليه
جمال زكي عينر
ليست هناك تعليقات:
إرسال تعليق